कांग्रेसद्वारा निर्वाचनमा भाग लिन ‘विश्वसनीय वातावरण’ को शर्त; महाधिवेशनको मिति मंसिरमै तोक्ने तयारी

काठमाडौँ: प्रमुख प्रतिपक्षी दल नेपाली कांग्रेसले आगामी २१ फागुनको प्रतिनिधिसभा निर्वाचन मा भाग लिनका लागि विश्वसनीय र शान्तिपूर्ण वातावरण सुनिश्चित गर्नुपर्ने शर्त अगाडि सारेको छ। साथै, पार्टीको आन्तरिक राजनीतिमा महाधिवेशनको विषयले प्राथमिकता पाएको छ, जसमा युवा नेताहरूले मंसिरमै नियमित महाधिवेशन गर्ने अडान लिएका छन्।

गृह मन्त्रालयले २४ भदौको अराजक घटनाका दोषीहरूलाई उन्मुक्ति दिने गरी जारी गरेको विज्ञप्तिप्रति कांग्रेसले गम्भीर आपत्ति जनाएको छ। प्रवक्ता डा. प्रकाशशरण महत ले सरकारको यो कदमले निर्वाचनको निष्पक्षता र शान्तिपूर्णतामाथि गम्भीर प्रश्न उठाएको ठहर गरेका छन्। उनले सरकारको असंवेदनशीलता र दलहरूसँग संवाद नगर्ने प्रवृत्तिको आलोचना गर्दै यसलाई आसन्न निर्वाचनका लागि ठूलो चुनौतीका रूपमा व्याख्या गरेका छन्।

सभापति शेरबहादुर देउवाको अनुपस्थितिमा उपसभापति पूर्णबहादुर खड्काले बैठक अध्यक्षता गर्दै आएका छन्। उपसभापति खड्कालाई नै अब कार्यवाहक सभापति दिने संकेत सभापति देउवाको छ। तर संस्थापन पक्षका कतिपय नेताहरू भने अहिले सभापति देउवाले कसैलाई कार्यवाहक नदिने दाबी गर्दै आएका छन्।

बिहीबार दिउँसो पदाधिकारी बैठक सुरू गर्दै उपसभापति खड्काले सभापति देउवाले पठाएको सन्देश सुनाएका थिए। सभापति देउवाले देश असजिलो परिस्थितिमा रहेकोले पार्टी एकताबद्ध भएर अघि बढ्नुपर्ने सन्देश पठाएका थिए।

सुशीला कार्की नेतृत्वको सरकारले प्रतिनिधि सभा विघटन गरी फागुन २१ मा चुनाव घोषणा गरेको छ। कांग्रेसले प्रतिनिधि सभा विघटनको विरोध गरेको छ र सरकारको उक्त कदम संविधानविपरीत भनेको छ। कांग्रेसका कतिपय नेताहरू प्रतिनिधि सभा पुनर्स्थापनाको सम्भावना देख्छन् भने कतिपय नेताहरू चुनावमा भाग लिनुपर्ने भएकोले त्यसअनुसार तयारी सुरू गर्नुपर्नेमा छन्।

२४ भदौको घटनामा छानबिन र कारबाहीको माग

‘जेनजी आन्दोलन’ को मागप्रति समर्थन जनाए पनि, त्यसपछिको आगजनी, लुटपाट, निजी सम्पत्तिमा आक्रमण, र नेताहरूमाथि हिंसा जस्ता घटनालाई लिएर कांग्रेसले तत्काल छानबिन र कारबाहीको माग गरेको छ। कांग्रेसको ठहर छ कि हिंसात्मक घटनाले आर्थिक र सामाजिक क्षति पुर्‍याएको छ र दोषीलाई उन्मुक्ति दिने सरकारी नीति कुनै पनि हालतमा स्वीकार्य छैन।

मंसिरमै महाधिवेशनको जोड, म्याद नथप्ने संकेत

कांग्रेसको आन्तरिक राजनीतिमा महाधिवेशनको बहसले तीव्रता पाएको छ। महामन्त्रीहरू गगन थापा र विश्वप्रकाश शर्मा ले मंसिरमै नियमित महाधिवेशन को प्रस्ताव गर्दै कार्यसमितिको म्याद थप नगर्ने स्पष्ट संकेत दिएका छन्।

पार्टीको विधानअनुसार कार्यसमितिको म्याद एक वर्ष थप्न सकिने व्यवस्था भए पनि, महामन्त्री थापाले म्याद थप्ने प्रस्ताव केन्द्रीय कार्यसमितिमा नलैजाने प्रतिबद्धता व्यक्त गरेका छन्। यसले विशेष महाधिवेशनको मागबाट पछि हट्दै नियमित प्रक्रियाबाटै नेतृत्व हस्तान्तरणको दबाब सिर्जना गरेको छ।

युवा नेता गुरुराज घिमिरे ले समेत ५०% प्रतिनिधिको हस्ताक्षर संकलन भइसकेको दाबी गर्दै मंसिरमै महाधिवेशनको प्रक्रिया सुरु गर्नुपर्नेमा जोड दिएका छन्।

आज पदाधिकारी बैठक, आइतबार कार्यसमिति

पार्टीको आगामी रणनीति र महाधिवेशनको कार्यतालिका तय गर्न आज दिउँसो १ बजे पदाधिकारी बैठक बस्दैछ। यो बैठकले असोज २६ गतेदेखि सुरु हुने केन्द्रीय कार्यसमिति बैठक को एजेन्डा तय गर्नेछ। आइतबारको केन्द्रीय कार्यसमिति बैठकले निर्वाचनमा जाने पार्टीको सर्त, रणनीति र महाधिवेशनको विस्तृत कार्यतालिका सार्वजनिक गर्ने अपेक्षा गरिएको छ।