May 22, 2022, Sunday
८ जेष्ठ २०७९, आईतवार

कांग्रेस सभापति देउवा आज प्रधानमन्त्री नियुक्त हुनु हुँदै

कांग्रेस सभापति देउवा आज प्रधानमन्त्री नियुक्त हुनु हुँदै

लुम्बिनी पत्र । नेपाली कांग्रेसका सभापति शेरबहादुर देउवा आज प्रधानमन्त्री नियुक्त हुँदै हुनुहुन्छ।
राष्ट्रपति कार्यालयले आजै देउवाको नियुक्ति र शपथको तयारी गरेको छ । शपथ ग्रहणको कार्यक्रम साँझ ५ बजे तोकिएको राष्ट्रपति कार्यालयका एक अधिकारीले बताउनु भयो।
सर्वोच्च अदालतले सोमबार देउवालाई प्रधानमन्त्री नियुक्त गर्न परमादेश दिएको थियो । सर्वोच्चले मंगलबार पाँच बजेभित्र देउवालाई प्रधानमन्त्री नियुक्त गर्न भनेको थियो ।
देउवा यसअघि चार पटकसम्म प्रधानमन्त्री बनिसक्नु भएको छ । प्रधानमन्त्रीको रुपमा उहाँको यो पाँचौ इनिङ हो ।
देउवाले आजै सानो आकारको मन्त्रिपरिषद गठन गर्ने तयारी गर्नु भएको छ । त्यसका लागि देउवा आन्तरिक परामर्शमा व्यस्त रहनु भएको छ।
हिजो असार २८ गते सर्वोच्च अदालतले प्रतिनिधिसभा विघटन गर्ने निर्णय बदर गर्ने फैसला गरेको छ । सो सम्बन्धी फैसलाको पूर्णपाठ पछि प्राप्त हुने जनाइएको छ । प्रधानन्यायाधीश चाेलेन्द्र शम्शेर जबराले साेमबार संक्षिप्त आदेश सुनाउँदै निर्णय बदर भएकाे जनाउनुभएकाे हाे ।  प्रधानन्यायाधीश चोलेन्द्रशम्शेर जबरासहित, दीपककुमार कार्की, मीरा खड्का, इश्वरप्रसाद खतिवडा र डा.आनन्दमोहन भट्टराई रहनुभएको संवैधानिक इजलासले साे फैसला गरेकाे हाे । साथै २०७८ साल साउन ३ गतेका लागि संसदकाे अधिवेशन डाक्न आदेशमा भनिएकाे छ ।

प्रतिनिधिसभा विघटन विरूद्ध सर्वाेच्च अदालतमा ३० वटा मुद्दा परेकाे थियाे । साे मुद्दाकाे सुनुवाइ असार २१ गते सम्पन्न भएकाे थियाे । गत जेठ ८ गते मन्त्रिपरिषद्को सिफारिसमा प्रतिनिधिसभा विघटन गरी आगामी कात्तिक २६ र मंसिर ३ गते मध्यावधि निर्वाचन तोक्ने गरी भएकाे निर्णय बदरकाे माग निवेदनहरूमा गरिएको थियो ।