जेनजी आन्दोलनमा ज्यान गुमाएका ४५ जनालाई सहिद घोषणा, प्रधानमन्त्री कार्कीको १४ बुँदे सुधार निर्देशन

काठमाडौं — भदौ २३ र २४ गतेको जेनजी आन्दोलनमा ज्यान गुमाएका ४५ जनालाई सरकारले सहिद घोषणा गरेको छ। सोमबार सिंहदरबारमा बसेको मन्त्रिपरिषद् बैठकले आन्दोलनका क्रममा काठमाडौंलगायत देशका विभिन्न भागमा मृत्यु भएका व्यक्तिहरूलाई राज्यको तर्फबाट सहिद घोषणा गर्ने निर्णय गरेको हो।

सूचना प्रविधि मन्त्री एवं सरकारका प्रवक्ता जगदीश खरेलका अनुसार गृह मन्त्रालयसहित सरोकारवाला निकायको अध्ययनपछि ४५ जनाको नाम सार्वजनिक गरिएको हो। सूचीमा ४२ जना आन्दोलनकारी र तीन जना प्रहरी (असइ मिलन राय, हवल्दार अमृत गुरुङ, जवान उत्तम थापा) समावेश छन्। अन्य मृतकको सनाखत प्रक्रिया जारी रहेको बताइएको छ।

सरकारले बेपत्ता व्यक्तिको छानबिन, सत्यनिरुपण तथा मेलमिलाप कोष नियमावली २०८२ स्वीकृत गर्दै विपद् संकटग्रस्त जिल्ला इलामका प्रभावित स्थानीय तहहरूलाई सहयोगस्वरूप ५ करोड ३० लाख रुपैयाँ विपद् व्यवस्थापन कोषमा जम्मा गर्ने निर्णय पनि गरेको छ। साथै, वैदेशिक रोजगार न्यायाधीकरणको सदस्यमा सहन्यायाधीवक्ता घनश्याम ओझालाई नियुक्त गरिएको छ।

यसै बैठकमा प्रधानमन्त्री सुशीला कार्कीले मन्त्री, सचिव तथा सुरक्षा प्रमुखहरूसँग संयुक्त छलफल गर्दै सुधारका लागि १४ बुँदे निर्देशन दिएकी छिन्। उनले भ्रष्टाचार नियन्त्रण, सुशासन, सेवा प्रवाह सुधार, सार्वजनिक खर्चमा मितव्ययिता, कर्मचारी सरुवा प्रणालीको पारदर्शिता, औद्योगिक वातावरण सुधार, निर्वाचन तयारी, पुनर्निर्माण नीति, जनशक्ति व्यवस्थापन, र कानुनको शासन प्रत्याभूत गर्ने विषयमा स्पष्ट कार्ययोजना बनाउन निर्देशन दिइन्।

प्रधानमन्त्री कार्कीले भनेकी छिन्, “तपाईंहरू स्थायी सरकार हो। आफ्नो ज्ञान, सिप, अनुभवको प्रयोग गरी कर्तव्य र उत्तरदायित्व पालनामा खरो उत्रनुहुनेछ। नयाँ पुस्ताले सुम्पेको समृद्धि, विकास, सुशासन, समानता र भ्रष्टाचारविहीन शासनको ग्यारेन्टी तपाईंहरूकै जिम्मा हो।”

सरकारको निर्णयले आन्दोलनमा ज्यान गुमाएका नागरिक र सुरक्षाकर्मीप्रति सम्मान प्रकट गर्दै राष्ट्रिय मेलमिलाप र सुधारको दिशामा नयाँ आशा जगाएको छ।